Ig heisse Barbara Held, bi es haubs Jahrhundert aut. Ig wohne ds Schwande im schöne Ämmitau. Ig bi ghürate mit em Viktor und ha 4 erwachseni Ching. Im Oktober 23 u März 26 bini scho Grosi worde.
Ig bi vo Bruef Pflegefachfrou. Mir tüe bure Deheime u ig hiufe dert mit u ga no 60 % ga wärche id Spitex ids Eggiwil.
Ig spile ir Brassband Felsegg. Zersch Es-Horn, när Euhonium u sit öppe 2 Jahr Posune. Ig ha sowiso gärn Musig. Ig singe gärn u spile chli Klavier. Weni einisch nüt ds tüe ha, tueni gärn, läse, brichte, es Kafi trinke u has gärn luschtig.
Ds JU – MU – SO – LA kenneni scho lang. Im Jahr 1991 bini im erschte Lager wos het gä, Teilnähmer gsi.